ಖಾಸಗಿ ಹೂಡಿಕೆಯಲ್ಲಿ ಏರಿಕೆ ಕಾಣುತ್ತಿದೆ ರಿಯಲ್ ಎಸ್ಟೇಟ್ ವಲಯ

ಭಾರತೀಯ ರಿಯಲ್ ಎಸ್ಟೇಟ್ ವಲಯವು ಖಾಸಗಿ ಹೂಡಿಕೆಯಲ್ಲಿ ವರ್ಷದಿಂದ ವರ್ಷಕ್ಕೆ ಹೆಚ್ಚಳವನ್ನು ಕಂಡಿದೆ. ಇದು ನಂಬಿಕೆಯ ಸಂಕೇತ ಮತ್ತು ಭಾರತೀಯ ಆರ್ಥಿಕತೆಯ ದೃಢವಾದ ಆರೋಗ್ಯವನ್ನು ಪ್ರತಿಬಿಂಬಿಸುತ್ತದೆ ಎಂದು ಉದ್ಯಮದ ವಿಶ್ಲೇಷಕರು ಹೇಳುತ್ತಾರೆ.

2021-22 ರ ಆರ್ಥಿಕ ವರ್ಷದ ಇದೇ ಅವಧಿಗೆ ಹೋಲಿಸಿದರೆ 2022-23 ರ ಆರ್ಥಿಕ ವರ್ಷದ ಮೊದಲಾರ್ಧದಲ್ಲಿ ಅಂತಹ ಹೂಡಿಕೆಗಳಲ್ಲಿ ಶೇಕಡಾ 40 ರಷ್ಟು ಹೆಚ್ಚಳವಾಗಿದೆ ಎಂದು ರಿಯಲ್ ಎಸ್ಟೇಟ್ ಸಲಹಾ ಸಂಸ್ಥೆಯಾದ ಅನಾರಾಕ್‌ನ ವಿಶ್ಲೇಷಣೆಯು ವರದಿ ಮಾಡಿದೆ.

ಪ್ರಸಕ್ತ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ಖಾಸಗಿ ಇಕ್ವಿಟಿ (PE) ಹೂಡಿಕೆಯು 2.8 ಶತಕೋಟಿ ಡಾಲರ್‌ನಷ್ಟಿದ್ದು, ಕಳೆದ ಆರ್ಥಿಕ ವರ್ಷದ ಇದೇ ಅವಧಿಯಲ್ಲಿ 2.0 ಶತಕೋಟಿಯಷ್ಟಿತ್ತು ಎಂದು ವರದಿ ಹೇಳುತ್ತದೆ. ಆದರೂ ಈ ಹೂಡಿಕೆಗಳು 2019-2020 ರ ಮೊದಲಾರ್ಧದಲ್ಲಿ ರಿಯಲ್ ಎಸ್ಟೇಟ್ ವಲಯವು ವರದಿ ಮಾಡಿದ 4.1 ಶತಕೋಟಿ ಡಾಲರ್‌ ಅಂಕಿಅಂಶಕ್ಕಿಂತ ಕಡಿಮೆಯಾಗಿದೆ ಎಂಬುದನ್ನು ಗಮನಿಸಬೇಕು.

ಕಳೆದ ಹಣಕಾಸು ವರ್ಷಕ್ಕೆ ಹೋಲಿಸಿದರೆ ಟಾಪ್ 10 ಡೀಲ್‌ಗಳು ಒಟ್ಟು ಹೂಡಿಕೆಯ ಶೇಕಡಾ 86 ರಷ್ಟಿದೆ. ಕಳೆದ ಹಣಕಾಸು ವರ್ಷದಲ್ಲಿ, ಟಾಪ್ 10 ಡೀಲ್‌ಗಳು ಒಟ್ಟು ಹೂಡಿಕೆಯ 80 ಪ್ರತಿಶತದಷ್ಟಿದ್ದವು. ಹೂಡಿಕೆಯ ಸರಾಸರಿ ಗಾತ್ರವು ಕಳೆದ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ 75 ಮಿಲಿಯನ್‌ ಡಾಲರ್‌ನಿಂದ ಈ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ 121 ಮಿಲಿಯನ್‌ ಡಾಲರ್‌ಗೆ ಏರಿಕೆಯಾಗಿದೆ. ಇದರ ಬಹುಪಾಲು ವ್ಯವಹಾರಗಳು ಅನೇಕ ನಗರಗಳಲ್ಲಿ ಮತ್ತು ಜಂಟಿ ಉದ್ಯಮಗಳಲ್ಲಿ ನಡೆದಿವೆ.

ಕಳೆದ ಹಣಕಾಸು ವರ್ಷದಲ್ಲಿ ಹೂಡಿಕೆಯ ಪ್ರಮುಖ ಕೇಂದ್ರಬಿಂದುವಾಗಿದ್ದ ಮುಂಬೈ ಮಹಾನಗರ ಪ್ರದೇಶ (MMR), ಈಗ ಇತರ ಪ್ರದೇಶಗಳಲ್ಲಿ ಆಗುತ್ತಿರುವ ಹೂಡಿಕೆಗಳಿಂದ ಕೆಳಗಿದೆ. ರಾಷ್ಟ್ರೀಯ ರಾಜಧಾನಿ ಪ್ರದೇಶ (NCR) 2023 ರ ಮೊದಲಾರ್ಧದಲ್ಲಿ 60 ಪ್ರತಿಶತದಷ್ಟು ಹೂಡಿಕೆಗಳನ್ನು ಕಂಡಿದೆ. ಸಾಲಕ್ಕಿಂತ ಈಕ್ವಿಟಿಯ ವಿಷಯದಲ್ಲಿ ಹಣವು ಯಾವಾಗಲೂ ಆದ್ಯತೆಯಾಗಿದೆ. ಈ ಹಣದ ಪ್ರವೃತ್ತಿಯು ಈ ಆರ್ಥಿಕ ವರ್ಷದಲ್ಲೂ ಮುಂದುವರೆದಿದೆ. ಸುಮಾರು 67% ಹೂಡಿಕೆಗಳು ವಾಣಿಜ್ಯ ವ್ಯವಹಾರಗಳ ಕಡೆಗೆ ಹೋಗಿವೆ.

ಅನಾರಾಕ್ ಕ್ಯಾಪಿಟಲ್‌ನ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಶೋಭಿತ್ ಅಗರ್ವಾಲ್ ಹೇಳುವಂತೆ, “ಎಫ್‌ವೈ 22 ರ ಮೊದಲಾರ್ಧ ಮತ್ತು ದ್ವಿತೀಯಾರ್ಧದಲ್ಲಿ ಖಾಸಗಿ ಇಕ್ವಿಟಿ ಹೂಡಿಕೆದಾರರ ಹೂಡಿಕೆಯ ಗಮನವು ಮುಂಬೈ ಮಹಾನಗರ ಪ್ರದೇಶದಲ್ಲಿತ್ತು. ಆದರೆ, ಪ್ರಸಕ್ತ ಆರ್ಥಿಕ ವರ್ಷದ ಮೊದಲಾರ್ಧದಲ್ಲಿ, ಇದು ಇತರ ಪ್ರದೇಶಗಳಿಗೆ ಸ್ಥಳಾಂತರಗೊಂಡಿದೆ. ರಾಷ್ಟ್ರೀಯ ರಾಜಧಾನಿ ಪ್ರದೇಶ NCR ನಲ್ಲಿ ಬಂಡವಾಳದ ಒಳಹರಿವು ಹೆಚ್ಚಾಗಿದೆ” ಎಂದಿದ್ದಾರೆ.