ಅಮೆರಿಕ ಮೇ 12:ಅಮೆರಿಕದಲ್ಲಿ ಡೆಮಾಕ್ರಟಿಕ್ ಪಕ್ಷವು ನೂತನ ಪೌರತ್ವ ಮಸೂದೆ ಮಂಡಿಸಿದ್ದು, ಗ್ರೀನ್‌ ಕಾರ್ಡ್‌ ವಿತರಣೆ ಕೋಟಾ ಮಿತಿ ಕೈಬಿಡುವ ಸಾಧ್ಯತೆ ಕಾಣುತ್ತಿದೆ.
ವಾಷಿಂಗ್ಟನ್: ಆಡಳಿತಾರೂಢ ಡೆಮಾಕ್ರಟಿಕ್ ಪಕ್ಷವು ಹೊಸ ‘ಪೌರತ್ವ ಮಸೂದೆ’ಯನ್ನು ಪರಿಚಯಿಸಿದೆ.
ಇದರ ಪರಿಣಾಮ ಗ್ರೀನ್‌ ಕಾರ್ಡ್‌(Green card) ವಿತರಣೆಗಾಗಿ ದೇಶಗಳಿಗೆ ನಿಗದಿಪಡಿಸಿರುವ ಕೋಟಾ ಮಿತಿ ಕೈಬಿಡಲು ಮತ್ತು ಎಚ್ 1ಬಿ ವೀಸಾ ವಿತರಣೆಯಲ್ಲಿ ಅಗತ್ಯ ಬದಲಾವಣೆಗಳನ್ನು ಮಾಡುವ ಪ್ರಯತ್ನ ನಡೆಯುತ್ತಿದೆ.
ಯುಎಸ್ ಪೌರತ್ವ ಮಸೂದೆ 2023 ಮಂಡಿಸಿದ ಸಂಸತ್ ಸದಸ್ಯೆ ಲಿಂಡಾ ಸ್ಯಾಂಚೆಜ್ ಅವರು, “ಎಲ್ಲ 11 ಮಿಲಿಯನ್ ದಾಖಲೆರಹಿತ ವಲಸಿಗರು ಪೌರತ್ವ ಪಡೆಯಲು ಅನುಸರಿಸಬೇಕಾದ ಮಾರ್ಗಸೂಚಿಗಳನ್ನು ಇದು ಒಳಗೊಂಡಿದೆ. ವಲಸಿಗರು, ಟಿಪಿಎಸ್ ಹೊಂದಿರುವವರು ಮತ್ತು ಕೆಲವು ಕೃಷಿ ಕಾರ್ಮಿಕರಿಗೆ ಪೌರತ್ವ ಪಡೆದುಕೊಳ್ಳುವ ಮಾರ್ಗವನ್ನು ಒದಗಿಸುತ್ತದೆ. ಹಾಗೆಯೇ, ಗಡಿಪಾರು ಭಯವಿಲ್ಲದೇ ತೆರಿಗೆಗಳನ್ನು ಪಾವತಿಸುವ ಮೂಲಕ ಐದು ವರ್ಷಗಳ ಕಾಲ ಪೌರತ್ವ ಪಡೆಯುವ ಹಾದಿಯನ್ನು ಇದು ನೀಡುತ್ತದೆ. ದೇಶದ ಕೆಲವು ಮಿತಿಗಳನ್ನು ತೆಗೆದುಹಾಕುವ ಮೂಲಕ ಉದ್ಯೋಗ-ಆಧಾರಿತ ವಲಸೆ ವ್ಯವಸ್ಥೆಯಲ್ಲಿ ಕೆಲವು ಬದಲಾವಣೆಗಳನ್ನು ಮಾಡಲು ಮಸೂದೆ ಪ್ರಸ್ತಾಪಿಸುತ್ತದೆ” ಎಂದರು.
ಪೌರತ್ವ ಮಸೂದೆಯು ಯುಎಸ್ ವಿಶ್ವವಿದ್ಯಾನಿಲಯಗಳಿಂದ STEM (ವಿಜ್ಞಾನ, ತಂತ್ರಜ್ಞಾನ, ಎಂಜಿನಿಯರಿಂಗ್, ಗಣಿತ) ವಿಷಯಗಳಲ್ಲಿ ಪದವಿ ಹೊಂದಿರುವರು ದೇಶದಲ್ಲೇ ಉಳಿಯಲು ಸುಲಭವಾಗುವಂತೆ ಮಾಡಲು ಪ್ರಯತ್ನಿಸುತ್ತದೆ. ಕಡಿಮೆ ವೇತನದ ಉದ್ಯಮಗಳಲ್ಲಿನ ಕಾರ್ಮಿಕರಿಗೆ ಹಸಿರು ಕಾರ್ಡ್‌ಗಳ ಪ್ರವೇಶವನ್ನು ಸುಧಾರಿಸುತ್ತದೆ. H-1B ಹೊಂದಿರುವವರಿಗೆ ಕೆಲಸ ನೀಡುತ್ತದೆ ಎಂದಿದ್ದಾರೆ.
“ಪೌರತ್ವ ಮಸೂದೆಯು ಕುಟುಂಬ-ಆಧಾರಿತ ವಲಸೆ ವ್ಯವಸ್ಥೆಯನ್ನು ಸುಧಾರಿಸುವ ಗುರಿ ಹೊಂದಿದೆ. ಇದು LGBTQ ಕುಟುಂಬಗಳು ಎದುರಿಸುತ್ತಿರುವ ತಾರತಮ್ಯವನ್ನು ನಿವಾರಿಸುತ್ತದೆ. ಅನಾಥರು, ವಿಧವೆಯರು ಮತ್ತು ಮಕ್ಕಳಿಗೆ ರಕ್ಷಣೆ ನೀಡುತ್ತದೆ. ನಮ್ಮ ಆರ್ಥಿಕತೆಯನ್ನು ಉತ್ತಮವಾಗಿಸಲು ಸಹಾಯ ಮಾಡುತ್ತದೆ. ನಮ್ಮ ದೇಶದ ಗಡಿಗಳನ್ನು ಹೆಚ್ಚು ಸುರಕ್ಷಿತಗೊಳಿಸಲು ಒತ್ತು ನೀಡುತ್ತದೆ. ಮೆಕ್ಸಿಕೋದಿಂದ ವಲಸೆ ಬಂದ ಪೋಷಕರ ಮಗಳಾಗಿ, ಯುಎಸ್ ಪೌರತ್ವ ಮಸೂದೆಯನ್ನು ಪರಿಚಯಿಸುತ್ತಿರುವುದಕ್ಕೆ ನನಗೆ ಗೌರವವಿದೆ. ನಮ್ಮ ಹದಗೆಟ್ಟ ವಲಸೆ ವ್ಯವಸ್ಥೆಯನ್ನು ಸರಿಪಡಿಸಲು ಕೈಗೊಂಡ ದಿಟ್ಟ, ಪರಿವರ್ತಕ ಚೌಕಟ್ಟು” ಎಂದು ಸ್ಯಾಂಚೆಜ್ ಹೇಳಿದರು.
ಭಾರತೀಯ ಅಮೆರಿಕನ್ನರು ಎಷ್ಟು ಕೊಡುಗೆ ನೀಡುತ್ತಾರೆ ಎಂಬುದನ್ನ ಬೈಡನ್ ಅರ್ಥಮಾಡಿಕೊಂಡಿದ್ದಾರೆ : ಅಫ್ತಾಬ್ ಪುರೆವಲ್
ಹೆಚ್ಚು ಬೇಡಿಕೆಯಿರುವ ಹೆಚ್ 1 ಬಿ ವೀಸಾಗಳನ್ನು ಒಂದೇ ಬಾರಿಗೆ ಮೂರು ವರ್ಷಗಳವರೆಗೆ ನೀಡಲಾಗುತ್ತದೆ. H -1B ವಲಸೆ ರಹಿತ ವೀಸಾ ಆಗಿದ್ದು, ಇದು ಯುಎಸ್ ಕಂಪನಿಗಳಿಗೆ ಸೈದ್ಧಾಂತಿಕ ಅಥವಾ ತಾಂತ್ರಿಕ ಪರಿಣತಿಯ ಅಗತ್ಯವಿರುವ ವಿದೇಶಿ ಉದ್ಯೋಗಿಗಳನ್ನು ನೇಮಿಸಿಕೊಳ್ಳಲು ಅನುವು ಮಾಡಿಕೊಡುತ್ತದೆ. ಭಾರತ ಮತ್ತು ಚೀನಾದಂತಹ ದೇಶಗಳಿಂದ ಪ್ರತಿ ವರ್ಷ ಹತ್ತು ಸಾವಿರ ಉದ್ಯೋಗಿಗಳನ್ನು ನೇಮಿಸಿಕೊಳ್ಳುವ ತಂತ್ರಜ್ಞಾನ ಕಂಪನಿಗಳು ಈ ವೀಸಾವನ್ನೇ ಅವಲಂಬಿಸಿವೆ.